\r\n\r\n\r\n\r\n\r\n\r\n\r\n\r\n\r\n

\n \n \nفديتك ياهوى نفسي مع الشدات خاويني \nفديتك لاقسى وقتي علي وناحت أشجاني \n \nأبيك في لحظة الفزعه تحط يديك بيديني \nوأبيك لياشكيت الياس تكون بساحة أوطاني \n \n أبيك البلسم لجرحي وأبيك النوم في عيني \nوأبيك اللي ليامني صحيت ألقاه بأحضاني \n \n \n طلبتك يابعد ذاتي أمانه لاتخليني \nتراني لو رحلت أبقى ضحية كيد عدواني \n \n سألتك بالله الوالي سألتك لاتجافيني \nلأني أموت بغيابك ياروحي وجثماني \n \n \n معي واصل مشاويرك أواسيك وتواسيني \nمعي إبقى مثل ظلي حذاري لاتعداني \n \n \n أبي منك الوعد إنك على غيري تبديني \nوأنا هذا وعد مني ماأبيعك وأشري الثاني \n \n \n وإذا بلسانك الصادق نطقت وقلت تغليني \nأنا بأعلن خبر عاجل تعالوا إقروا إعلاني \n \n \n أبكتب داخل الإعلان إلى من صار يغليني \nإلى قلبي إلى عمري إلى من صار يهواني \n \n إليك أهدي نغم شعري وكل عرق نبض فيني \nوإليك أهدي شذى عطري وياسميني وريحاني \n \n وأبكتب داخل الإعلان وصيه كان شاريني \nمعي بالطيب عاملني ولاتجرح بهجراني \n \n ومهما تقسي الدنيا علينا لاتعاديني \nولاتسعى أبد في يوم في عندي وعصياني \n \n \n أبيك دكتور لآلامي من أحزاني تداويني \nوأبي لاكفت أبصاري تكون النور لأعياني \n \n وأبي لافاضت أنفاسي تكون أول معزيني \nوأبيك بيدينك الثنتين تلف الجسم بأكفاني \n \n \n وبعد ماأكون في قبري تذكرني وتبكيني \nوأكون حزن على بالك ماتغفل وتنساني \n \n \n أبي لاقالوا العذال وش اللي بينك وبيني؟ \nتبسم وتدمع عيونك من الحسره على فقداني \n \n \n وتجاوبهم إني حي وبالأضلاع تخفيني \nوإني فؤاد الخاطر معك لاصرت وحداني \n \n \n أبيك تقول هو مامات أحاكيه ويحاكيني \nأبيك تقول هو موجود وخبيته بوجداني \n \n \n أبيك تقول هو دمي اللي في شراييني \nلأنك دمي اللي كان يضخه عرق شرياني \n \n وأبي لازادت جراحك تخيلني وتناديني \nوتفتش داخل شعورك وتهمسلي وتلقاني \n \n وإذا طال السفر إقرا كتاباتي ودواويني \nوقل ياكثر ماخلي كتب لي شعر وأهداني \n \n \n ترى لو للقصيد عيون والله ماتقديني \nلأني للقصيد عيون وإسمك رمز ديواني \n \n وترى لو للحروف أهداب تعجز لاتغطيني \nلأني للحروف إيحا وحيك سر لإذعاني \n \n \n تداركت الزمن يمك الا ياليت يمديني \nأخاف أجيك متأخر وسيف الوقت ياطاني \n \n نسيت من أجلك الصادق اللي الروح يعطيني \nونسيت الأول والآخر والقاصي مع الداني \n \n وجاري المسح للباقي وأنت اللي تكفيني \nحرام أحط معك غيرك وأحبك وأظلم الثاني \n \n كفايه أنت في دنياي أمل باقي يسليني \nأمل صوته إذا ضاع الأمل ألقاه بأركاني \n \n \n كفايه همسك الحاني إذا جاني يدفيني \nويبدد وحشة ظروفي وتشرق فرحة أكواني \n \n \n تراك بعالمي شمعه تبدد ظلمة سنيني \nوتراك بدنيتي دنيا لها لون وشكل ثاني \n \n ودنيا" مابها حسك ماأبيها وعمرنا فاني: \nأنا سميتك الدنيا وأنته وش تسميني؟؟ \n \n \n

\r\n

\r\n

\r\n

\r\n \r\n

\r\n

\r\n

\r\n \r\n
\r\n

الموضوع الأصلي :\r\nتراك بعالمي شمعه تبدد ظلمة سنيني || الكاتب :\r\nمزون الشوق || المصدر :\r\nشبكة همس الشوق

\r\n\r\n\r\n\r\n\r\n\r\n\r\n\r\n\r\n\r\n\r\n
\r\n\r\n \r\n
\r\n
\r\n\r\n\r\n
\r\n \r\n\r\n\r\n\r\n\r\n\r\n\r\n
\r\n\r\n\r\n